पालकांना धाक दाखवण्यासाठी शाळेकडून बाऊंसरचा वापर,

पुण्याच्या बिबवेवाडी परिसरातील या घटनेमुळं विद्येचं माहेरघर पुरतं हादरलं आहे. 

पुणे : विद्येच्या माहेरघरात काय चाललंय असाच प्रश्न तुम्हाला ही बातमी पाहून पडेल. कारण ही बातमीच तशी आहे. सध्या पुण्याच्या बिबवेवाडी परिसरातील या घटनेमुळं विद्येचं माहेरघर पुरतं हादरलं आहे. 

बिबवेवाडीतील पुण्याच्या क्लाइन मेमोरियल स्कूलमध्ये महिला बाऊन्सरकडून पालकांना मारहाण केल्याचा व्हिडिओ सध्या समोर आला आहे. 

फी भरण्याच्या वादावरून मुख्याध्यापकांनीच पालकांना मारहाण करण्यास सांगितल्याचा आरोप करण्यात आला आहे. मुलाची शाळेची फी भरण्यावरून संबंधित पालक आणि मुख्याध्यापक यांच्यामध्ये वाद झाला आणि त्यानंतर मारहाण करण्यात आली.

पालकांना शाळेतच मारहाण झाल्याने ही घटना नेमकी किती गंभीर आहे हे कळत आहे. सर्वांना धक्का देणाऱ्या या घटनेप्रकरणी मयुरेश गायकवाड यांनी तक्रार केली असून, बिबवेवाडी पोलीस ठाण्यात अदखलपात्र गुन्ह्याची नोंद करण्यात आली आहे.